Ye ek Aavirbhaav Original Horror Story hai, jiska purana title 'Aankhein' tha.
Kabir dikhne mein to theek thaak hi tha, lekin uski aankho mein maano jaadoo tha. Uski jheel jaisi gehree aankho mein na jaane kitni hi ladkiyaan apne dilo ko kho chuki thi. Shuru mein to Kabir ke liye ladkiyan phansana sirf ek khel tha, lekin dheere dheere usay samajh aayaa ki kaise wo apni in aankho se faaydaa uthaa saktaa hai.
Lagbhag sabhi dating apps aur websites par Kabir ne apna profile banaa rakhaa tha. Uska kaam tha sheher mein akeli reh rahi ladkiyo ko apne jaal mein phansaana aur apni aankho kaa jaadu unpar chalaa kar unke paise aur keemtee cheezon ko loot kar hawaa ho jaana. Aisi hi ek date par usay mili - Raaginee.
Raaginee, jise maano Kabir ki aankho se pehlee hi mulakat mein pyaar ho baitha. Wo har wakt sirf aur sirf Kabir ki aankho ke baare mein hi baat karti. Kuchh wakt baad to Kabir ko bhi ye sab thoda ajeeb lagne lagaa. Aur shaayad Ragini se peechhaa chhudaane ke liye hi usne apne plan par thoda jaldi kaam karna shuroo kar diyaa.
Ek do mulaakaato ke baad, Kabir ek shaam Ragini ke ghar mein baitha tha. Aur wahaan bhi wo ladki Kabir ki aankho ki shaan mein kaseede padhe jaa rahi thi. Is beech Kabir uske poore ghar ka muaaynaa kar hi rahaa tha ki tabhi Ragini ne ek Polaroid camera nikaal kar Kabir ke chehre ke saamne tikaa diyaa. Kabir sehem saa gayaa kyuki is se pehle kisee ladki ne aisi harkat nahi ki thi.
“Ye kis liye?” usne poochha.
“Tumhaari aankhein, inhein hamesha ke liye apne paas rakhne waali hu main.” ye kehkar Raaginee Kabir ke bahut kareeb aa gayi aur danaadan uske chehre ke kai saare photos kheenchne lagi.
Flash ki chamak aur Ragini ke is vyavhaar se hakkaa bakkaa Kabir samajh hi nahi paaya ki wo ladki kab ek junglee billee ki tarah uske oopar kood gayi. Wo uske kapde utaar nahi balki phaadne par tulee thi. Ragini ne Kabir ke saath khelna shuru kar diya, wo kabhi uske seene par kaat’tee to kabhi gardan par. Shuroo mein Kabir ko lagaa ki ladki shaayad zyada hi josh mein hai, lekin thodi der baad usay samajh aa gayaa ki agar usne ise nahi rokaa toh ye ladki aaj waakai mein usay khaa daalne waali thi.
Kabir chillaaya, “Bus karo! RUKO!”
Lekin Ragini rukne waali kahaan thi. Aur uske baad un dono ke jism aapas mein zor aajmaayish karne lage. Ab Ragini ki hawas maano bhookh mein badal gayi thi. Aur Kabir bechara kisi shikaar ki tarah apni us shikaari se khud ko bachaane ke liye us se guttham gutthaa ho rahaa tha. Isee dhakkaa mukkee ke dauraan Ragini ka sar bistar ke konay se jaa takraaya aur wo nidhaal hokar bistar ke konay se jhool gayee.
Kabir ki jaan mei jaan aayi lekin jab usne dekha ki Ragini kaafi der rak hil dul nahi rahi hai to usne uski nabz tatolni shuru ki.
Nabz chal rahi thi.
Ye jaankar Kabir ko ek raahat mehsoos hui. Wo chor zarur tha, lekin kisee ka khoon karnaa abhi uske liye kaafi dour ki baat thi. Wo thodi der tak apna sar haatho mein liye sochtaa rahaa ki tabhi uske dimaag mein khayaal aaya - ki ye to uske liye aur bhi achhi baat hai. Usay ab baaki ladkiyo ki tarah Ragini ko baandhne aur kisee konay mein thoonsne ki zarurat nahi padegi. Ab wo berok-tok poore ghar ki talaashi le saktaa hai.
Bus, Kabir uthaa aur us ghar ka ek ek kona chhaan’ne lagaa.
Thodi der baad Ragini ke ghar ka sabhi keemtee saamaan, Kabir ne usi ke ek bag mein bhar liya tha. Chori ka saamaan le jaane ke liye bag bhi Kabir apni shikaar ladkiyo ke ghar se hi leta tha. Aur jab bag abni hadh se bhi zyada bhar chukaa tha, Kabir ne ghar se nikalne ke baare mein sochaa. Apne kapde pehen kar usne jaane se pehle behosh padi Ragini ke paas se apni wo photos bhi uthaa liye jo us paagal ladkee ne kheenche the.
Kabir bag ke saath nikalne hi wala tha ki tabhi usay khidki ke kaanch mein apna chehra dikha. Uske chehre, gardan aur pataa nahi kahaan kahaan kharoncho ke nishaan tthe. Jin se khoon nikal kar sookh chukaa tha. Kabir is tarah sadak par nahi jaanaa chaahtaa tha. Aur isiliye wo turant Ragini ke bathroom mein gayaa aur apnaa chehraa dhonay lagaa.
Lekin tabhi uski nazar bathroom mein aainay ke peechhe bani almaari ke andar gayi. Usne dheere se almaari kholi to dekha, uske andar dher saare plastic ke martbaan rakhe tthe, aur un martbaano mein rakhe ek peele se chemical mein tair rahi thi - dher saari aankhein. Insaani aankhein.
Aur har martbaan par lagi thi ek photo. Polaroid camera se li hui. Wahi camera jis se Ragini kuchh der pehle Kabir ki photo kheench rahi thi. Har photo mein majood ladke ki aankhein behadh khoobsurat thi, aur Kabir un tasveero par likhe un ladko ke naam saaf padh paa rahaa tha.
Ragini ne maano apne bathroom mein khoobsoorat ladko ki aankho ka ek museum banaa rakhaa tha. Kabir ko samajh aa gayaa tha ki aaj Shikaar khud Shikaar hote hote bach gayaa tha. Oopar waale ka shukriya karte huay wo turant us bathroom se baahar nikalne ke liye paltaa hi tha ki saamne chaadar mein liptee Ragini ko khade dekh kar chaunk gayaa.
Us ladki ki aankho mein wahi hawas thi, aur haatho mein thi - ek kulhaadi!
Kabir kuchh soch bhi paata, is se pehle Ragini ke haatho mein thami wo kulhaadi zor se ghoomi. Kulhaadi chalaane ke andaaz se ye saaf tha ki wo ladki is kaam mein kitnee maahir thi. Kulhaadi seedhee Kabir ke baayein kandhe mein aadhi ghus gayi. Ek tez cheekh ke saath Kabir bathroom mein peechhe ki deewaar se jaa takraaya.
Ragini ke haatho ne dobara kulhaadi ghumaayi lekin is baar Kabir khud hi ladkhadaa kar bathtub mein jaa giraa. Is se Ragini ka nishana chook gayaa aur is se wo ladki kaafi khafaa hui.
Kabir ab Raginee ke bathtub ko apne kandhe se beh rahe khoon se laal kartaa jaa rahaa tha. Ragini ek kaatil muskaan ke saath uske paas aayi aur hanste huay boli -
“Kya baat hai yaar, aaj se pehle kisee ladke ne mera kaam itna aasaan nahi kiya tha. Waise, mera saamaan lekar kahaan jaane ki taiyaari thi?”
Kabir royaa, gidgidaaya, lekin Ragini kisee paagal ki tarah hanse jaa rahi thi. Kabir ke saamne hi usne bathroom ki ek aur almaari se ek taiyaar injection nikaala. Khoon beh jaane ki wajah se Kabir ka shareer ab dheela padtaa jaa rahaa tha. Usay wo injection lagaane mein Ragini ko zyada mashakkat nahi karni padi aur wo poora ka poora injection us ladki ne Kabir ki gardan mein utaar diyaa.
Injection ki dawaa ka asar Kabir ke jism par honay lagaa aur neend ne usay apni baanho mein kaskar jakad liya. Ab Kabir, Ragini ke bathtub mein behosh padaa tha.
Ragini bathroom se baahar gayi aur jab wo waapaas lauti to uske haath mein ek lambaa aur chaptaa pechkus tha. Wo itminaan se aakar Kabir ke paas baith gayi aur uske haath kisi trained mechanic ki tarah Kabir ke chehre par chalne lage.
‘Pupp’ jaisi ek aawaaz ke saath Kabir ki aankhein ek ek karke uske chehre se aazaad ho gayi. Ragini ne unhein unke liye khaali martbaan mein rakhaa aur un par Kabir ke khoon se lathpath kapdo se nikaal kar kuchh der pehle kheenchi hui photos chipkaa di. Uske baad usne us photo par uska naam likh diyaa - Kabir.
Iske baad Ragini Kabir ko dheere dheere marne ke liye usi bathtub mein chhod kar chali gayi.
Naa jaane kitnee der baad Kabir ko hosh aaya, lekin uski aankho ke aage andhera chhaa chukaa tha. Rote, sisakte, pehle usne Ragini ko hi pukaara. Par tab tak Ragini ke ghar ke baahar ek taala latak chukaa tha. Naye naye andhe huay Kabir ne apne haatho se bathroom ka har ek kona tatolna shuru kar diya aur tab uske haath aayi bathroom ki khidki. Wo nahi dekh paa rahaa tha ki neeche kya hai, ya khidkee kitnee oonchaayi par hai, lekin usay yaad tha ki Ragini ka ghar teesre floor pe tha. Kabir ne ek lambee saans lee, aur apne jism ko khidkee se neeche dhakel diyaa.
Par wo badkismat ye nahi jaanta tha ki Noida ke kaii builder building ke floors ke saath bhi beimaani karte hain. Wo teesra floor asal mein chauthe jitni oonchaai pe tha. Aur ye ek floor adhik ki oonchaai, Kabir ki haddiyon ko thodi aur zyada peesne waali thi.
Bhadaak karke Kabir kuchh gumlo ke oopar jaa kar giraa. Uske badan ki na jaane kitni haddiyaan ek saath tooti. Uski taang ki haddi to khaal phaadkar baahar nikal aayi thi. Thodi hi der baad Kabir ki cheekhon se poori building ke log uske aas paas jamaa ho gaye.
Us raat Kabir ko hospital mein hosh aayaa. Wahaan usne apni aap beetee sabhi ko bataayi. Police ne Ragini ke ghar dabish dee, lekin poora ghar khaali milaa. Building ke log bhi us ladki ke baare mein zyada kuchh nahi bataa paaye, siwaaye iske ki wo kisee se bhi baat nahi karti thi, aur har hafte ek naye ladke ko apne ghar laati thi.
Is waakye ke lagbhag do saalo baad haatho mein safed chhadee aur aankho par kaalaa chashmaa lagaaye Kabir chupchaap kisi cafe ke ek konay mein baitha kisee ka intezaar kar rahaa tha ki tabhi uske kaano mein ek jaani pehchaani awaaz padi –
Wahi paas baithi ek ladki kisee ladke se baat kar rahi thi, wo boli -
“Tumhari aankhein, inhein hameshaa ke liye apne paas rakhne waali hu main.”
Kabir ke jism mein maano ek sihran si daud gayi.