Dada ji ki Khaansi

Ye kissa mere bachpan ke ek dost ka hai. Main Khurja naam ke ek chhote se kasbe mein palaa-badhaa tha, aur wahi par meri Faisal se dosti hui.

Faisal aur main Video Game ki dukaan par milay tthe. Aur mere mohalle mein jo video game arcade tha, wo poore Khurja mein sabse zabardast tha. Shuru shuru mein hum dono ki rivalry hoti thi Tekken ke oopar par. Par phir hum dost ban gaye.

Faisal ek achhi khaasi ameer family se aata tha, lekin wo log kaafi conservative tthe. Haal ye tha ki Faisal apne ghar pe jhooth bolkar video game khelne aata. Uske Abba Dubai mein kaam karte tthe, aur wo apni baaki ki family ke saath Khurja mein rehta tha jahaan unki sunaar ki dukaan thi.

Faisal video game arcade mein aakar game khelta, cigarette peeta aur gappein ladaataa, lekin apne mohalle mein pahunchte hi wo sabse shareef ladkaa ban jaataa. Wajah thi, uske Dada ji ka khauf.

Faisal ke jo Dada ji puraane khayaalo waale insaan tthe. Kum bolte tthe aur apni aapnkho se hi sabko daraa diyaa karte tthe. Main unke kabhi milaa nahi, par Faisal aksar apne Daddu ke kisse bataaya kartaa tha. Dada ji ka favourite kaam tha Faisal ke ghar mein sabko strict discipline mein rakhnaa. Toh agar ghar mein koi late raat tak jaagta tha, ya zor zor se hansta tha, toh achaanak Dada ji ke khaansne ki awaaz aati thi. Aur ye khaansi beemari waali nahi hoti thi, balki iska matlab hota tha ki chup ho jaao aur so jaao.

Toh Faisal batata tha ki jab uske Papa Dubai se aate, toh latest gadgets wagareh saath laate tthe. Toh Faisal aur uska bhai der raat tak, picture dekhte, ya gaane sunte, ki thodi der mein Dada ji ke khaansne ki awaaz kamre ke darwaaze se aa jaati thi. Aur awaaz aane ke saath hi, dono bhai chupchaap sonay bhaag jaate tthe.

Toh us ghar mein Dada ji se zyada Dada ji ki khaansi ka khauf chaltaa tha.

Ye sab baatein Faisal mujhe aksar batata rehtaa ki kaise kal Dada ji ne khaans kar uski Ammi ko ishara kiyaa ki sar dhak lein, wagareh wagareh.

Par ek din, jab main Bunty se baat kar rahaa tha to Faisal ke Daddu ka zikra chhidaa. Aur Bunty ne mujhe bataya ki Faisal ke Daddu ka intekaal kaii saal pehle ho chukaa tha. Aur tab, jab Faisal doodh peetaa bachchaa tha.

Mujhe ye sab samajh nahi aaya, aur maine agle din Faisal ko pakad liyaa. Us se poochhaa ki agar tere Daddu ka intekaal tere doodh peene ki umar mein hi ho gayaa tha to phir tu ye baatein aise kyu sunaata hai jaise kal ki hi baat ho?

Ispar Faisal bola, ki Daddu ka intekaal bhale hi saalo pehle ho gayaa tha, lekin unki khaansi aaj bhi unke ghar mein sunaai deti hai. Phir usne mujhe parso ka kissaa bataya jab Faisal raat ko TV dekh raha tha. Usay apne peechhe se, Dada ji ke khaansne ki awaaz aayi. Aur jaisi aadat uski thi, khaansi sunte hi usne turant TV band kiya aur, “So raha hu Daadu” bolkar seedha goli ki tarah apne room mein bhaag gayaa.

Faisal se milay huay mujhe ek 20 saal se oopar ho chuke hain. Main nahi jaanta ki ab wo Khurja mein hai bhi yaa nahi, par agar wo mujhe phir milaa toh ye zarur poochhunga ki kya uske Daddu abhi bhi uski family ko apne discipline mein rakhte hain?

Gurgaon ka ek Haunted House

Ye kissa ek Aavirbhaav User ka bhejaa huaa hai jinki request par hum unkaa asli naam reveal nahi kar rahe hain. Isiliye is kahaani mein diye gaye sabhi characters ke naam badle huay hain.

Trigger Warning: Is Kahaani mein Suicide ka zikra hai, isiliye aage padhne se pehle khudk ko mentally ready kar lein.

Shreya aur Rohan ki shaadi lockdown mein hui thi, isiliye wo dono shaadi ke baad kahi ghoomne bhi nahi jaa paaye tthe. Balki lockdown ki restrictions thodi kum honay par un dono ne ek nayaa ghar dhoondhna shuru kiya jismein dono rehne waale tthe. Shreya is se pehle apne parents ke saath hi rehti thi, aur Rohan kuchh roomates ke saath ek flat mein. Isiliye dono ne shaadi se thoda pehle jaldi jaldi ek ghar dhoondhna shuru kiya.

Shreya ke parents ke contacts ke through ek 2 bedroom flat unhein Shreya ke parents ke ghar se thodi hi dour par mil bhi gayaa. Shaadi ke baad dono us ghar mein shift ho gaye, aur ghar se hi kaam karne lage, lekin us ghar mein kuchh toh ajeeb tha.

Aur iski shuruaat hui, jab Rohan ne sabse pehle kuchh cheezein notice ki. Ek raat kareeb 2 baje Rohan bathroom jaane ke liye utha. Uske baad wo kitchen mein gayaa aur paani peene lagaa, jab usne dekha ki andhere mein Shreya chalkar khaali bedroom ke andar gayi hai. Wo log is doosre bedroom ko home office ki tarah istemaal karte tthe.

Rohan ko lagaa ki shaayad kuchh kaam yaad aa gayaa ho, aur wo paani peekar, apne bedroom mein chalaa gaya, lekin usne dekha ki Shreya toh bed par so rahi thi. Wo turant office room mein gayaa aur usne dekha ki us room ka main door aur balcony door khule huay tthe. Saath hi us room ka fan bhi on tha.

Jabki Rohan ki aadat thi ki wo raat ko sonay se pehle sab off karta tha.

Usne Shreya ko kuchh nahi bataya lekin thode din baad ye sab cheezein kuchh zyada hi honay lagi. Ghar ke darwaaze apne aap khulte, aur pankhe apne aap on ho jaate. Phir ek din Rohan ne us raat ke baare mein Shreya ko bataa diya. Shreya us par naaraaz hui kyuki aisi cheezein chhupaani nahin chahiye. Lekin phir usne apne Dad ko phone kiya.

Shreya ke Dad apne local electrician ko saath lekar aaye aur poore ghar ki electricity check ki. Kuchh problem nahi nikli. Kuchh din baad Shreya ki Mom ne apni beti aur daamaad ko dinner ke liye bulaya. Shaam ko dono ghar lock karke nikle. Der raat dono ghar aaye aur main door kholne par unhone dekha - ki ghar ke baaki ke saare door khule huay tthe, aur saare ke saare fans on tthe. Shreya ne apne dad ko ye sab bataya toh unhone kahaa ki next day wo phir se electrician ko bhej dene, kyuki ye electrical fault lag raha hai.

Agle din electrician phir aaya aur is baar bhi koi problem nahi nikli. Us raat Shreya aur Rohan ne apna dhyaan is cheez se hataane ke liye film dekhne ke decision liya. Dono bedroom mein lete lete film dekh rahe tthe aur khana baahar se order kiya. Jab delivery boy aaya, toh Rohan khana lene main door par gayaa. Khana lekar usne door lock kiya aur jab wo palta, usne dekha, ki office room mein ek shadow figure khadi hui usi ki taraf dekh rahi thi. Wo kisi moorti ki tarah bina hilay wahi khadaa raha jab Shreya ki awaaz usay aayi.

Shreya bhi apne room ke door se us figure ko dekh paa rahi thi. Wo cheekhi, “Rohan, wo kaun hai?”

Aur Shreya ke cheekhte hi, wo shadow uske aur Rohan ke saamne hi gaayab ho gayi. Dono ke dono turant bhaag kar ghar se baahar aa gaye. Shreya ne apne Dad ko phone kiya aur wo unhein thodi der baad apne ghar le gaye.

Iske baad un dono ne faisla kar liya tha ki ab hum is ghar mein nahi rahenge. Nayaa ghar dhoondha aur uske baare mein pehle hi poochha ki ismein koi ‘chakkar’ to nahi. Shreya ke Dad ne packing karne mein dono ki madad ki aur tab gully ke watchman se is ghar ke baare mein poochha.

Shuru mein to usne kuchh nahi kahaa lekin thode paise dene par usne bataya ki aaj se kuchh saal pehle is ghar mein rehne waali aurat ka divorce ho chuka tha, aur uske pati ko bachcho ki full custody mil chuki thi. Is se dukhi hokar us aurat ne ghar ke kamre mein pankhe se latak kar khudkushi kar li.

Ghar chhodne ke baad us ghar ke landlord ne Shreya aur Rohan ko unka deposit dene se manaa kar diya, lekin jab Shreya ne usay ‘samjhaya’ ki agar usne aisa nahi kiya toh wo sabko is ghar ki history ke baare mein bataa degi, us aadmi ne turant unka deposit aur ek mahine ka rent lauta diya.

Ek baat aur -- Jab logo ko us aurat ki laash mili, tab pankha chal raha tha.

Aur usi kamre ko Rohan aur Shreya ne apna home office banaya tha.

---

Ye kahaani ek Aavirbhaav user ne bheji thi jo ki unka khud ka experience tha. Aap bhi apne experiences aur kahaaniyaan hamein bhej sakte hain is email address par: aavirbhaavhorrorstories@gmail.com

Tumhare Peechhe Kaun Ro Raha Hai ?

Ye kissa Sudatta ne bheja hai jo us samay Navi Mumbai mein reh rahi thi. Ise padhte samay please Aavirbhaav ke Ground Rules ka dhyaan rakhein. Dhanyawaad.

---

Baat 2014 ki hai jab main do aur ladkiyo ke saath Navi Mumbai mein ek apartment share karti thi. Hamaari shifts kuchh is tarah thi ki ghar mein ek time par ek hi ladki hua karti thi. Hum teeno weekends pe hi ek doosre ki shakal dekh paati thi. Aur kabhi kabhi wo bhi nahi hota tha kyuki kaam ke baad social life bhi thodi bahut jeeni thi.

"Tab jaakar meri jaan mein jaan aayi. Par phir mere dimaag mein khayaal aaya ki agar tasveer isi kamre mein thi, toh doosre kamre se wo awaaz kis cheez ke girne ki thi?"

Apartments ek puraani building mein tthe jo ki pataa nahi kab ki bani ek high rise thi. Aur ek chawl ke design jaisi thi. Lekin usmein hamaari hi tarah aur bhi kai young log rahaa karte tthe. Aisa lagta tha maano wo building hum jaise logo ko rent pe dene ke liye hi banaai gayi thi.

Khair choonki wo apartment hum teeno ne ek saath milkar liya tha, hamne settle honay ke baad ek chhoti si housewarming party rakhi, jismein hamaare close friends hi aaye tthe. Unmein se mere ek dost jiska naam Saket tha, ne akele mein mujhse ek baat kahi thi jise mujhe seriously lena chahiye tha. Lekin tab mujhe lagaa ki shaayad Saket mujhse mazey lene ke liye bakwaas kar raha hai.

Party mein main dekh rahi thi ki kaise Saket kaafi der se uncomfortable feel kar raha tha. Pehle mujhe lagaa ki ye uski kisi personal ya professional problem ka pressure hai, lekin mauka milte hi usne mujhe akele paakar bol utha, "I dont think tumhein is ghar mein rukna chahiye."

"Kyu?" maine poochha.

"Mujhe is ghar mein kuchh achhi feeling nahi aa rahi. Aisa lag raha hai jaise is ghar mein bahut saara pain bharaa hua hai aur maano ye ghar ronay ke liye taiyaar baitha hai."

Saket ki kisi baat ka koi matlab mujhe us wakt samajh nahi aaya, aur maine baat idhar udhar ghuma di. Party khatm hui, aur sab apne apne ghar chale gaye. Lekin hum teeno ladkiyaan usi ghar mein thi. Aur phir wo sab shuru hua.

Wo ghar 2 kamro ka tha, jinmein ek kamre mein hum teeno ke bistar tthe aur doosre mein hamara saamaan rakha tha. Ghar ke hall ko hamne ek living room banaa diya tha jahaan guests aakar baith sakein.

Saamaan waale kamre ki deewar par ek Hanuman ji ki tasveer thi jo ki ek cardboard waale frame par chipki hui thi. Ye tasveer ek dhaage ke saath kamre ki deewar mein ek keel par tiki hui thi. Raat ko achaanak aawaaz aati aur hum check karte to dekhte ki wo tasveer giri padi hai.

Tasveer hamaare saamne kabhi nahi giri, lekin kaii baar achhe se taangne ke baad bhi wo hamesha zameen par gir jaati. Ab mazey ki baat ye hai ki us kamre ki khidki hamesha band rehti thi. Kisi bhi tarah ki hawaa ya aandhi ka us kamre mein aana possible nahi tha. Us tasveer ke frame, dhaage aur yahaan tak ki keel ko bhi hamne check kar liya tha lekin sab kuchh theek tha. Thode din baad hamne wo tasveer us deewaar se hataa kar ek table ke oopar rakh di. Par wo wahaan se bhi girti rehti. Ab hum teeno ka ek routine ban gayaa tha jismein jise bhi tasveer giri hui milti wo usay uthaa kar seedha kar deti.

Par sabse creepy baat kuchh aur hi thi. Ye shuru hua jab housewarming party ke ek do din baad main raat ko apne ek dost se phone par baat kar rahi thi. Baat ke beeche mein achaanak mera dost mujhse bola, "Tere ghar mein koi bachchaa hai kya?"

"Nahi to." maine kahaa.

"Phir ye bachche ke ronay ki awaaz kahaan se aa rahi hai?"

Mera dost ekdum sure tha ki usay phone ki meri side se background mein kisi bachche ke ronay ki awaaz sunaai de rahi thi. Maine phone kaan se hataa kar dhyaan se sunne ki koshish ki lekin raat ke sanaate mein aur koi awaaz mere kaan se nahi takraai. Maine phir apne dost se poochhaa aur usne bataya ki bachche ki ronay ki awaaz abhi bhi aa rahi hai.

Us raat ke baad aisa kaii baar hota, main chaahe apne dost se baat karti, gharwaalo se ya colleague se, har kisi ko bachche ke ronay ki awaaz sunaai deti. Maine pataa karne ki koshish ki lekin us building mein bachche waala married couple mujhe to nahi mila. Kyuki wahaan sab hum jaise singles hi tthe jo saste rent ke liye wahaan reh rahe tthe.

Ek raat ki baat hai, main sonay ki koshish rahi thi ki achaanak mujhe doosre kamre se tasveer girne ki awaaz aayi. Neend to aa nahi rahi thi, isiliye main uthkar doosre kamre mein tasveer uthaane chali gayi. Par poore kamre mein dhonndhne ke baad bhi mujhe tasveer wahaan nahi mili. Thak kar main waapas bedroom mein aa gayi aur maine dekha ki wo tasveer meri window sill par rakhi hui thi.

Darr ke maare mere paer kaanpne lage. Maine turant apni roommate ko phone lagaya jo apni shift par thi aur us se ye sab bataya.

"Arre wo?" wo boli, "Wo maine hi din mein bedroom mein rakh di thi. Kyuki baar baar girti rehti thi us room mein."

Tab jaakar meri saans mein saans aayi. Par phir mere dimaag mein khayaal aaya ki agar tasveer yahi par thi, toh doosre kamre se wo awaaz kis cheez ke girne ki thi?

Maine turant apni roommate ko call kiya lekin is baar usne nahi uthaya kyuki shaayad wo busy ho gayi thi. Toh maine Saket ko phone kiya aur usay tasveer aur awaaz ke baare mein bataya.

Saket mujhe bataane lagaa ki usay pehle se hi is ghar se achhi vibes nahi aayi thi lekin tab usne mujhse poochha, "Tum akeli ho kya?"

"Haan"

"Kahin jaa sakti ho is wakt? Kisi friend ya relative ke yahaan?" wo bola.

"Kyu?"

"Agar possible ho to chali jaao. Ruko mat." Saket bola.

Maine kuchh sochne ke baad apna bag pack kiya aur apne ek Uncle ke yahaan chali gayi jo Santacruz rehte tthe. Wahaan jaakar subah maine Saket ko phir se phone kiya aur tab usne bataya,

"Kal raat tumse baat karte wakt mujhe tumhare background se do awaazein aa rahi thi - ek kisi chhote bachche ke ronay ki aur doosri kisi aurat ke ronay ki."

Us din ke baad maine ek nayaa ghar dhoondhna shuru kar diya aur tab tak main sonay ke liye Santa Cruz aa jaati thi. Us ghar mein ab kaun reh raha hai aur wahaan kya ho raha hai, mujhe koi idea nahi hai.

---

Aapne padhaa Sudatta ka ek chilling experience. Aap bhi apne experiences aur stories Aavirbhaav ko bhej sakte hain. Likh kar ya record karke unhein swapnilnarendra@gmail.com par bhej dijiye.