Aliens in Mussoorie ?

Mussoorie ke saath waise to kaii haunted kisse aur kahaaniyaan jude huay hain, lekin pichhle dino wahaan ke aasmaan mein kuchh aisa dikhaa, jo bhoot preto se alag toh tha, lekin tha utna hi exciting aur hairaan kar dene waala.

Image for representation only

Yu toh aasmaan mein dikhte Aliens ya UFO ke photos aur videos, internet par bhare pade hain lekin har video ya picture reliable nahi hoti. Lekin, India ke jaane maane Paranormal Investigator Jay Alani jab koi video post karte hain, toh usay reliable maan'na hi padega.

Kuchh dino pehle Jay Alani ne Mussoorie mein raat ke aasmaan mein ek ajeeb-o-gareeb cheez dekhi, jiska koi bhi explanation mushkil hai.

Haalaanki Jay bhi nahi jaante ki unhone apni aankho se kya dekha lekin unki taraf se aaya ye video waakai mein chaunkaane waala hai. Is video mein aasmaan mein kya dikh rahaa hai, ye abhi tak clear nahi ho paaya hai.

Is video mein dikhne waali cheez ko bahut log UFO bol rahe hain, lekin main aapko bataa du ki ab UFO ko UAP kahaa jaane lagaa hai. UAP, yaani Unidentified Aerial Phenomenon. Aisa isliye kiya gayaa kyuki UFO ka matlab hota hai Unidentified Flying Object, aur is term se Flying Objects ko aerial vehicle samjha jaata rahaa hai. Par beete kaii saalo mein kucch sightings aisi hui hain jinmein aasmaan mein kuchh hairaan kar dene waali cheez dikhti to hai lekin itna saaf hota hai ki ye koi Vehicle ya Udantashtari nahi hai.

Isiliye aap bhi Jay Alani ke is video ko dekhiye aur khud apna dimaag chalaane ki koshish keejiye ki aakhir ye kyaa ho saktaa hai. Aur agar aapko koi idea aaye to comments mein zaruru bataayein.

Is video ko Jay Alani ke instagram par dekhne ke liye yahaan click karein.

Edit: Is sighting ke baad ye clear ho chukaa hai ki jo kuchh bhi Jay Alani ne dekha, wo darsal ek Satelite Train thi, na ki ek UAP.

Iske alawaa duniya mein pehle bhi na jaane kitni hi aisi UAP sightings hui hain jinhein hum abhi tak samajh nahi paayein hain. Unmein se sabse mash'hoor sightings ki ek compilation ye rahi -

---

Is post mein dikhaaya video, Jay Alani ke instagram feed se liyaa hua hai. Agar aapke paas bhi aisi hi kisi mysterious jagah ya waakye ki jaankaari hai toh usay hamaare email address aavirbhaavhorrorstories@gmail.com par bhejiye,

jise hum website par feature karenge.