Khujlee - Part 1

Ye kissa mere puraane dost Rohit ka sunaya hua hai. Rohit aur main kaii saal pehle ek company mein saath kaam kiya karte tthe.



Yun to Rohit ek khush-mijaaz ladkaa tha, jiskee mazedaar baato ka lutf uthaane ke liye hamesha uske paas jaakar baith jaaya karte tthe. Par phir ek din Rohit ne hamein apni zindagi ka ek aisa waakya bataya jiske baad har koi uske paas jaane se bhi darne lagaa.

Kissa tab ka hai jab Rohit ek chhota sa bachchaa tha. Umra yahi koi 10-12 saal ki rahi hogi, jab Rohit aur uska jigree dost Sharib Indore ke paas ke ek chhote se kasbe mein apnaa bachpan masti mein bitaa rahe tthe.


Rohit aur Sharib ek number ke kaandee launde tthe, jiska matlab hai ki dono kahi bhi, kabhi bhi koi chhoti ya badi sharaarat karke bhaag aate. Aur ismein in dono ki personalities ka achhaa khaasaa yogdaan tha.


Jahaan Sharib wo ladkaa tha jise aag mein ghee aur logo mein chaabi bharnaa bahut pasand tha, toh doosri taraf Rohit wo launda tha jo ek second mein kisi bhi dare ko karne ke liye taiyaar ho jaata tha. Ek tarah se dekha jaaye to ye ek Ram milaai jodi thi. Sharib har baar Rohit ko koi kaand karne ke liye uksaataa, aur aglaa khushi khushi wo kar bhi daaltaa. Uske baad dono ke dono wahaan se bijlee ki tezi se gaayab bhi ho jaate. Par ek kissa aisa hua, jo shuru to ek mazaak se hua, par usne in dono ladko ki kismat badal daali.


Rohit aur Sharib jis school mein padhte tthe, uske peechhe ek chhota sa jungle tha. Ab toh us zameen par ek nayi colony basi hui hai, par aaj se 20 saal pehle wo jagah ekdum veeraan huaa karti thi. Aur usi veeraane mein hua kartaa tha ek ped; jise us kasbe ke log Chudhail ka Ped kahaa karte tthe. Wahaan ke logo ka maan'na tha ki wo ped ek chudhail ne apne rehne ke liye banaya tha. Wo ped itna oonchaa tha ki zameen se dekhne par uska tanaa aasmaan mein doosre pedo ke jhurmut mein chhipkar gaayab ho jaata. Kahaa jaata hai ki ye ped us chudhail ne is liye banaya tha taaki wo iski sabse oonchi daal pe baith kar poore kabse par nazar rakh sake.


Khair, ye kissa Rohit ke Dada ke zamaane se mash'hoor tha aur ab log jaan chuke tthe ki Chudhail jaisi koi cheez nahi hoti. Par hamaare dono laundo ko chain kahaan tha? So ek din Sharib ne, Rohit se shart lagaayi, ki agar 'usmein dum hai' to wo raat ke wakt us chudhail ke ped par chadh ke dikhaaye aur kum se kum 5 daal oopar tak chadhe. Sharib apne character ke hisaab se jhat se maan bhi gayaa. Dono dosto mein 5 rupaye ki shart lagi, aur raat honay ka intezaar kiyaa jaane lagaa.


Us shaam mausam ne ek alag hi roop le liyaa tha. Aandhee-toofaan ke saath baarish ka andhesha bhi tha. Yu to baarish ho kar chuki hi thi, lekin lag rahaa tha ki abhi uska gussaa shaant nahi hua hai. Par aise mein Sharib aur Rohit, school ke peechhe ek torch liye us Chudhail waale ped ko dhoondhne jaa pahunche.


Aandhi se hiltaa wo ped, is wakt khudh hi koi chudhail lag rahaa tha. Par ab peechhe hatnaa Rohit ko manzoor nahi tha. Sharib se 5 rupaye taiyaar rakhne ki baat kehkar Rohit us ped ki taraf chal padaa.


Sharib ped ke neeche khadaa dekh rahaa tha ki kaise Rohit ek ke baad ek daal chadhtaa jaa raha tha. Ek, do, teen, aur jab wo chauthi daal par chadhne ki koshish kar rahaa tha, toh Sharib ko samajh aaya ki wo shart haarne waala tha. 5 rupaye bachaane ke liye usne jee jaan se Rohit ko darana aur bhatkaanaa shuru kar diya, "Dekh ooopar chudhail.. dekh tere peechhe bhoot" aur pataa nahi kya kya bolkar usne koshish kee, ki kaise bhi Rohit neeche utar aaye. Par Rohit is sab ke baawzood chauthi daal par chadh chukaa tha.


Sharib ke shart haarne aur jeetne ke beech ab bus ek daal ki oonchaai aur reh gayi thi. Baarish ki wajah se ped kaafi geela tha, aur isi wajah se Rohit ko us paanchvee daal par chadhne mein dikkat ho rahi thi.


Aur isi beech Sharib ko ek idea aaya, usne geeli zameen se mitti uthaakar dhele banaaye aur unhein Rohit ki taraf pheinkna shuru kiyaa. Shuru mein toh Sharib ka nishaana chookta rahaa, lekin ek mitti ka dhela, jismein ek chhotaa sa kankar bhi tha, seedha Rohit ki aankho ke oopar jaa lagaa. Geeli mitti phail kar Rohit ki aankho ke oopar jum gayi, aur kankar ki chot se wo chhota sa ladka sehem gayaa, aur uska haath us daal par se phisal gayaa jise usne pakad rakhaa tha.


Us daal ki oonchaai lagbhag itni thi jitni ek dumanzilaa makaan kee honi chahiye.


Sharib ne dekha, uska dost, Rohit, seedha us oonchaai se raat ke andhere mein zameen par jaa giraa.



Baaki ki kahaani, aage ke bhaag mein.
















38 views0 comments

Recent Posts

See All